Жақында Өзбекстан мемлекетінің астанасы Ташкент қаласындағы «Узбекистон давлат томашабинлар» театрында «Азия таланттары» атты мектеп оқушылары арасында Халықаралық өнер байқауы өткен болатын. Осы байқауға ауданымыздағы «Балалар өнер мектебінің» оқытушылары Айша Айтқұлова мен Назерке Қалменнің өнерлі шәкірттері де қатысқан еді. Бұл сапар жерлестеріміз үшін сәтті басталды. Музыкалық аспаптарда орындау номинациясы бойынша 11-13 жас аралығында өткен байқауда Назерке Елемес тамаша өнер көрсетіп бірінші орыннан көрінсе, 14-16 жастағылар арасында Дарья Самойлованың бағы жанып, екінші орынға нағыз лайық екенін танытты. Осылайша көрші мемлекетте топ жарып, өнер байқауының шыңынан көрінген оқушыларымыз Ташкенттің көрікті жерлерін аралап, өзбек елінің мәдениетімен терең танысып, аудан абыройын асқақтата ауылға көтеріңкі көңіл күймен оралды. Біз жас өнерпаздардың алдағы қадамдарына сәттілік тілейміз. Жеңістерің құтты болсын!