ТҮЛКІБАС: ШАЛҒАЙДАҒЫ АУЫЛДА БАЛАБАҚША АШЫЛДЫ

Жаңа жыл аудан орталығынан шалғай орналасқан Абай ауылының тұрғындары үшін жан жадыратар жағымды жаңалықпен басталды, деп хабарлайды El-aina.kz сайтының тілшісі.
Бұрын тау қойнауының бауырына қоныс тепкен бұл елді мекенде періштелер мекені болып табылатын – балабақша мүлде болмаған екен. Бұл жағдай әрине, жұмыстан қолдары босамайтын ата-аналарға кішкентайларын қайда қалдырарын білместен едәуір қиындық туғызып жүретін. Енді міне, ақ түйенің қарны жарылып, 100 орындық «Қанткүл әже» атты (құрылтайшысы Дулат Құлжабаев) заманауи балабақша пайдалануға беріліп, есігін сәбилерге айқара ашты. Негізінен Абай, Пістелі ауылдарының балаларына арналған балабақшада барлық жағдайлар қарастырылған.
Өткен сенбіде аталмыш жаңа балабақшаның салтанатты ашылу рәсіміне «Аманат» партиясы аудандық филиалының төрағасы Қ. Еркебаев, аудандық білім бөлімінің басшысы Е. Қадырбек, Түлкібас ауданының Құрметті азаматы, зейнеткер Қ.Ахметов қатысып, ауыл тұрғындарының қуаныштарын бірге бөліссе, айтыскер ақын Тұрысбек Аспандиярұлы жырдан шашу шашты. Осылайша Абай ауылында қуаныштың көбесі сөгіліп, жағымды жаңалық орын алды.