ӨНЕР — ҰЛТТЫҢ ЖАНЫ

Мәдениет-ұлт өмірінің айнасы, ғасырлар бойы үзілмей келе жатқан халықтың рухани келбеті, мейірімі мен парасат-пайымы. Дана халқымыз «Өнер- ұлттың жаны» деп бекер айтпаса керек. Өркениетті ұлт ең алдымен тарихымен, өнерімен, әлемдік мәдениеттің алтын қорына қосқан үлесімен танылып, бағаланады. Кез-келген елдің не ауыл-аймақтың ауызбіршілігі мен ынтымағын ауылдық мәдениет ошағына қарап танисың. Озық-тозығы жетіп, қараусыз қалғанынан ағайынның араздығын, ауылдастың бір-біріне қапалығы барын бағамдайсың. Айналасы гүлденіп, ажарланып, абаттандырылып тұрғанынан ауылдастың ынтымағының жоғарылығын, сана биігінің көркемдігін аңғарасың. Міне, сол себепті де ауылдық клубтардың жұмысы алыс-жақын қонақтарға қызық, маңызды. Жалпы, Түлкібас ауданы әкімдігінің мәдениет,тілдерді дамыту, дене шынықтыру және спорт бөлімінің аудандық мәдениет үйі мемлекеттік коммуналдық қазыналық кәсіпорнына қарасты 25 мәдениет мекемесі, 9 мәдениет үйі, 16 ауылдық клубы бар. Соның ішінен Балықты, Жабағылы, Машат сынды ауылдық мәдениет үйлерінің бүгінгі жұмысымен таныстыру мақсатында меңгерушілеріне хабарластық.
60 ЖЫЛДЫҚ ТАРИХЫ БАР МӘДЕНИ ОШАҚ
Түлкібас ауданы әкімдігінің мәдениет, тілдерді дамыту, дене шынықтыру және спорт бөлімі аудандық мәдениет үйі мемлекеттік коммуналдық қазыналық кәсіпорнына қарасты Балықты ауылдық округінде орналасқан Балықты ауылдық мәдениет үйі 1963 жылы салынған. Көгілдір отынмен қамтамасыз етілген мәдениет ошағында барлық жағдаят қарастырылған. Өнерпаздарға арнайы сахналық киімдер, музыкалық құрылғылар орналастырылған. Ән, би, домбыра үйірмелері қолға алынып, 121 қатысушы өз өнерлерін жандандырып келеді. Мәдениет үйінің директоры Рысты Шымырбаева. Есімі ауданға ғана емес күллі қазаққа танымал меңгеруші адал еңбегімен елінің елеулісі, халқының қалаулысы болған мәдениет саласының ұзақ жылғы қызметкері. Еңбек өтілі барысында көптеген байқауларға қатысып жүлделі орындарға ие болып, ауданның атын өнер әлемінде қалықтатып келеді. Ал, Рысты апайымыздың шәкірттері өнер әлемінде кеңінен танылып жүр. Сонымен бірге Рысты Әлімбетқызы көптеген әндердің авторы, әнші, сазгер. Балықты ауылдық мәдениет үйінде өтетін қай жиынды алып қарасаңызда өте тиянақты, жоғары деңгейде ұйымдастырылып, қаз-қалпында әдемі қойылған нөмірлерге куә боласың. Халқының сахнаға, өнерге деген құрметін көріп таңданасың һәм қызығасың. Өнерлі ұл-қызына берген қошеметін, ақ батасын көріп, расыменде үлгілі ауыл деп танисың. Қазақтың қонақжайлылығын, ақ көңіл, адалдығын осы ауылдың азаматтары айтқызбайақ ұқтыратындай. Айналасы тап-таза, абаттандырылып, әдемі гүлдермен ажарландырылған мәдениет үйінің жұмысы біз бен сіз ойлағаннан да керемет. Елдің өнерпаздарға деген құрметі де ерек.
-​Ауылдың күйбең тіршілігі қашан бітсін. Таң бозарып атқаннан кеш манаурап батқанға дейін тынымсыз қарбалас қой. Сондай тіршіліктен қажып шаршаған сәтте мәдениет үйіне барып ән тыңдап, би билеп, өнерлі азаматтардың өнерін тамашалап, тынығып қалатынымыз рас. Сондай сәттерде бізге керемет көңіл-күй сыйлап, көріспей жүрген құрбы-көршілермен қауыштырып, әдемі кеш ұйымдастырып жүрген өнерпаздарымыза шынайы алғыс айтамын. Өнерлері өрге жүзсін,- деді Балықты ауылдық округінің тұрғыны Айнұр Шамдаулетқызы.
БІЗ ЕМЕС БІЗДІҢ АУЫЛ ӨНЕРЛІ
Түлкібас ауданы әкімдігінің мәдениет, тілдерді дамыту, дене шынықтыру және спорт бөлімі аудандық мәдениет үйі мемлекеттік коммуналдық қазыналық кәсіпорнына қарасты Машат ауылдық округінде орналасқан Машат ауылдық клубы 1966 жылы салынған. Қазіргі таңда клубта 2 адам жұмыс істейді. Мәдениет мекемесінде 3 үйірме бар. Олар: әжелер ансамбілі, домбыра, көркемсөз үйірмесі. Мәдениет үйінде жоспарға сай түрлі іс-шаралар және жоспардан тыс іс-шаралар қосымша өткізіліп тұрады. Клуб ыңғайластырылған.Ауылдық клубтың меңгерушісі Байжұма Бақытжан. Өнерлі, талантты келешекте көптеген жетістіктерге жететін, өмірін өнермен өрнектеген жас маман. Клуб меңгерушісінің облыстық, республикалық байқауларға танысып, ауданымыздың абыройын асқақтатып жүргеніне куәміз. Ақындығымен, іс-шараларды сауатты жүргізе алатын қабілетімен ерекшеленетін Бақытжан Байжұманың ұжымы өзгелерге үлгі боларлықтай сапалы. Ауылдық клубта «Наурыз бесаспап аспазшылар» байқауы, «Асыл арман» ән кеші, «Өмір дастан жазылғанда», «Ауылға барам» тақырыбында көптеген ауқымды іс-шаралар өтіп келеді.
-Жас таланттарды жарыққа шығарып, бойындағы қабілетін аша білу менің басты мақсатым. Байқасаңыз таланттың бәрі ауылдан шыққан. Біздің де топырақ киелі. Әуелетіп ән шырқап, күмбірлете күй шертетеіндер жетерлік. Тек оларды баптап, бәйгеге қоссақ жеткілікті. Жұмыс жүйелі. Ауыл азаматтарына керемет кеш сыйлауға әрқашан дайынбыз. Жұмылсақ концерт, біріксек байқау ұйымдастыра алатын шаққа жеттік. Біз емес біздің ауыл өнерлі,- дейді клуб меңгерушісі Бақытжан Байжұма.
КӨПТІҢ СӨЗІНДЕ, КӨЗІНДЕ ЖҮРГЕН ҮЛГІЛІ КЛУБ
Түлкібас ауданы әкімдігінің мәдениет, тілдерді дамыту, дене шынықтыру және спорт бөлімі аудандық мәдениет үйі мемлекеттік коммуналдық қазыналық кәсіпорнына қарасты Жабағылы ауылдық округінде орналасқан Жабағылы ауылдық клубының іргетасы 1965 жылы қаланған. Қазіргі таңда 2 қызметкер жұмыс жасайды. Клубта екі үйірме бар: Домбыра және көркемсөз. Мәдениет мекемесінде ауыл тұрғындарына арналып «Түлкібас — жер жаннаты», «Балауса бағым, шаттық пен қуаныш ордасы», «Ораза айт- игілік пен мейіріміділік мерекесі» атты тақырыптық іс-шаралар өтті. «Ауылды азаматына қарап таны» деген сөз бар қазақта. Ең көп іс-шара өткізілетін клубтардың бірі осы Жабағылы ауылдық клубы. Біз журналист ретінде де осы аймақта өткен көптеген іс-шараларға куәміз. Онда өтетін әр концерттің немесе жиынның ең керемет, сапалы, әрі тамаша ұйымдастырылатынына қуанамыз. Әуелетіп ән айтып, мың бұрала билей алмасақ та, өнерлі қазақтың қаны бойымызда болғаннан кейін, оның киесін, иісін оқып, білмесекте бағамдай аламыз. Міне, осындай өнерден хабарлы не хабарсыз жандарды өздеріне баурай білетін һәм әр көрсеткен өнерлерімен көрермендерін қызықтыра алатын осы ұжым деп танимыз. Қашанда залы лық толатын, өнерлі балалары кідірмей, мүдірмей, қысылмай өнерлерін көрсете алатын, заманауи жабдықтармен көрермендерін таң қалдыра білетін ұжымның жұмысы шыныменде қуанарлықтай. Мұндағы ел ағалары да бір-біріне аса қамқор, шынайы тілектес, ниеттес. Бір баласы бәйгеге шықса, бүкіл ауыл азаматы тақымын қысып, тілеуін тілейді. Осыдан-ақ ауызбіршілігі мығым, ынтымағы берік ел дерсің. Қазақтың ұлттық мейрамдарын тойлауының өзі, елге насихаттауының өзі бөлек, ерек. Көп азаматтың алғысын алған, көптің көзі мен сөзінде жүрген ауылдың мәдениеті жоғары. Сізге де қызық болса, келесі кезекті концертіне барып көруге кеңес береміз. Тынығып, күйбең тіршілік, күнделікті қарбаластан бір сәт болсын арылатыныңызға сенімдіміз.