АУДАН БАСШЫСЫ ТАРИХИ БАСЫЛЫМНЫҢ БҮГІНІМЕН ТАНЫСТЫ

Ауданның ақпарат айнасы болған «Шамшырақ» қоғамдық-саяси газетінің редакциясына аудан басшысы Асқар Сұлтанұлы арнайы келді. Аудан басшысын газет редакторы Марат Қалтаев қарсы алды. Өңір басшысы 95 жылға жуық тарихты артқа тастаған басылымның бүгінгі тыныс-тіршілігімен танысып, тілшілер қауымымен тілдесті. Аудан басшысының қара шаңыраққа келуіне орай редакцияда қалам тербеп, қызмет еткен бірнеше ақын, жазушылар мен тұрақты оқырмандар легі де шақыртылды. Сатирик, ақын-жазушы Алпысбай Боранбайұлы, ақын Серғазы Әбілмажанов, Гүлдарай Сатымбекова, жазушы, журналист Маханбетжан Көлбаев, тұрақты оқырман, бірнеше кітаптың авторы Өміртай Қалықұлов және жас ақын, ұстаз Балқыбек Нұрислам мырзалар топты толықтырды. Олар аудан әкімі болып тағайындалған Асқар Сұлтанұлына тілеулестіктерін жеткізіп, сүйікті басылымдарына айналған «Шамшырақ» газетінің өткенін тізбектеп берді.
Ақпарат майданына айналған редакцияға алғаш рет келген аудан басшысы газеттің 1989 жылдан бергі жинақталған архив беттерімен танысты. Газет жанынан жұмыс істеп жатқан жарнама орталығының өнімдерін де назардан тыс қалдырмады. Орталық меңгерушісі Салима Ақылбекқызы дизайнерлік қызметтермен таныстырып, баспа өнімдерінің сапасын түсіндіріп берді.
-Осы ауданның азаматы, перзенті болғаннан кейін бала күнімізден бастап «Шамшырақ» газетін оқып өстік. Енді аға жасқа жетіп, газеттің кең көлемде дамып, алға ілгерілегеніне куә болып отырмын. Тамаша жұмыс деуге болады. Алдағы уақытта газеттің тек қағаз жүзін емес, ПДФ форматында қоса жарыққа шығаруды, халыққа онлайн нұсқада ұсынуды жөн деп санаймын. Осы бағытта да жұмыс істесеңіздер құпа құп болар еді. Алпысбай ағамыздың талай кітабын ауыл мен қала ортасын поездбен байланыстырып жүргенде, алып оқыдық. Қысқасы, сіздердің қаламдарыңыздан шыққан әрбір туындымен таныспын десем де болады. Баршаңызға шығармашылық шабыт тілеймін, қаламдарыңыз мұқалмасын. Ауылға келгендегі басты мақсат- туған жерге пайдамызды тигізу, бір бұрышының дамуына үлесімді қосу болатын. Осы жолда бүгінге дейін бірнеше кездесулер ұйымдастырып, ауыл-ауылды аралап, сіздер сияқты елдің қамын жеген, болашағын ойлаған қазыналы қарттармен кездестім. Шешімі табылмаған бірнеше мәселелер тізбегін жасап, қажетті инвесторларды тартуды жоспарлап отырмыз. Халық айтқан мәселенің барлығы түптеп келгенде қаражатқа, аудан бюджетіне келіп тіреледі. Дегенмен, оның барлығына бөлінген қаржы жетпейді. Өз басым бұл қызметке дейін Астана, Алматы, Шымкент, Түркістан қалаларында жұмыс істедім. Көптеген адамдармен таныстым. Қызмет барысында «елген барсаң осы жағынан көмектесемін» деген демеушілер көп болды. Қазіргі таңда сол азаматтармен байланысып, ауданның алға ілгерілеуі жолында жоспар құрудамыз. Сіздердей арқамызды қағып, ақ батасын беретін ақсақалдар барда біздің көшіміз кері кетепейтініне сенімім мол. Ауыз су, каналдар жүйесі, мектептер құрылысы, жол, жарықтандыру, мәдениет ошақтарының ескіруі, ауыл атауларының өзгеруі сынды ел болған соң мәселе болатыны сөзсіз ғой. Рет-ретімен аталған, айтылған, түртілген дүниелерді оңынан шешуге ықпал боламыз деген сенімім мол. Сіздермен қауышып отырғаныма қуанышты екенімді білдіре отырып, ой-пікірлеріңізді де тыңдасам деген ниет білдіремін,- деді аудан басшысы Асқар Сұлтанұлы.
-Шығармашылықтың қара шаңырағы саналатын «Шамшырақ» газетінің редакциясына қош келдіңіз. Бұл газет 95 жылға жуық тарихты еңсерген. Алғашқы жылдары екі тілде аптасына екі рет жарыққа шығып отыратын. Бертін келе тек қазақ тілді нұсқада аптасына бір рет қана оқырмандарына жол тартып жүр. 5000 ға жуық оқырманды тамаша мақалаларымен қуантып жүрген басылымның бүгінгі хәлі жақсы. Жас тілшілермен толыққан. Апта сайын келісті сұхбаттар, кәсіпкерлердің берекелі кәсіптері жайлы әдемі мақалалар жарыққа шығады. Әр аптадағы жаңа санын өз басым асыға күтіп, мән беріп оқуға тырысамын. Алдыңызда отырған ардагерлердің барлығы газеттің тарихи беттерінде қалған өлеңдер мен мақалалардың авторлары. Күні бүгінге дейін шығармашылықтан қол үзбеппіз. Басылым ұжымы бұрынғы үрдісті қайта қолға алып, аптасына екі реттен оқырмандарына жетіп жатса нұр үстіне нұр болар еді. Ақпарат күнде алмасып жатқан заманда материал таппау мүмкін емес қой. Оқырманды қызықтыра білу де, құмарынан шыға білу де тілшілердің тарапында. Осы дүниені назарға алсаңыз. Аға буынның айтып жатқан орталықтың атауын «Тұраркент» деп, ауданның атауын «Түркібасы» деп өзгерту шешімдерін менде қос қолдап қолдаймын. Елге келгендегі мақсаттарыңыз бен жоспарларыңыз жүйелі түрде жүзеге асып, елдің, халықтың ықыласына бөленген, қызмет жолында еліне пайымды еңбегі сіңген әкім болуыңызға тілектеспіз,- деп ақын, ардагер ұстаз Серғазы ағамыз пікірін білдірді.
Еркін форматта шығармашыл жандармен өткен басқосу соңында Алпысбай Боранбайұлы, Гүлдарай Сатымбекова, Балқыбек Нұрислам қаламдарынан туындаған көркем өлеңдерін оқып, аудан әкімінің алғысына бөленді.