Атырау облысында өткен жылы аса ауыр қылмыс санатына жататын 7 қарақшылық шабуыл жасалған. Полиция қызметкерлері күдіктілердің бәрі ұстап, қылмыстың ізін суытпай ашты деп хабарлайды El-aina.kz сайтының тілшісі KAZINFORM ақпарат агенттігіне сілтеме жасап.
Атырау облыстық полиция департаментінің баспасөз қызметінен мәлім еткендей, адамды тонау мен қарақшылық шабуыл жасау ауыр және аса ауыр қылмыстар санатына жатқызылған.
«Тонау – бұл бөтен мүлікті ашық ұрлау, ал, қарақшылық – бөтен мүлікті ұрлау мақсатында адамның өмірі мен денсаулығына зақым келтіріп, қорқытумен ұштасқан шабуыл жасау әрекеті. Атырау облысында өткен жылы 7 қарақшылық дерегі тіркеліп, барлығы ашылды. Оның ішінде микро-қаржы кеңесі мен букмекерлік лотоклубқа 1 реттен қарақшылық шабуыл жасалған. Осы және жеке адамдарға жасалған қарақшылық деректеріне байланысты күдіктілері ізін суытпай ұсталып, қамауға алынды. Күдіктілерге қатысты ҚР Қылмыстық кодексінің 191-бабымен (Тонау) сотқа дейінгі тергеу жүргізілді», -деп хабарлады департаменттің баспасөз қызметі.
Қазір Атыраудағы Қылмыстық-атқару жүйесі департаментіне қарайтын №66 түзету мекемесінде қарақшылық дерегімен 33 сотталушы жазасын өтеп жүр. Оның ішінде Атырау облысынан 18, Маңғыстаудан — 14, Жамбыл облысынан 1 сотталушы бар. Сотталушылар 1 жылдан 14 жылға дейін бас бостандығынан айырылған.
Еске сала кетелік, бұған дейін Атырау түрмесінде есірткі қылмысымен сотталған 33 әйел жазасын өтеп жүргенін жазған болатынбыз.
