Жер сілкінісі кезінде Алматыда неліктен дыбыстық дабылдың қосылмағаны туралы қалалық төтенше жағдайлар департаментінің басшысы Нұрлан Атығаев түсініктеме берді. Бұл туралы El-aina.kz сайтының тілшісі Stan.kz ақпарат агенттігіне сілтеме жасап хабарлайды.
Қалалық төтенше жағдайлар департаментінің басшысы Нұрлан Атығаевтың айтуынша, қалада 843 дыбыстық дабыл бар.
Бұл қала аумағын 100% қамтуға мүмкіндік береді.
«Дыбыстық сиреналар жер сілкінісінің магнитудасы 5,5 балдан асқанда іске қосылады. Бұл жолы жер асты дүмпуінің қуаты 4 және 5 балл аралығында болды. Сондықтан дабылдарды іске қосудің мәні болмады. Олар керісінше дүрбелең туғызар еді», – деді қалалық төтенше жағдайлар департаментінің басшысы.
Еске сала кетейік, бүгін түнгі сағат 03:00-де 8 адам жарақатпен ауруханаға жатқызылды. Жарақат алған үш адам тұрғын үйлердің 2 және 3-қабатынан секірген. Тағы 36 адам түрлі жеңіл және орташа ауырлықтағы жарақата алып, медициналық көмекке жүгінді.
