Спорттық шараның ашылу салтанатына аудан әкімі Нұржан Ізтілеуов, аудандық мәслихаттың төрағасы Хамит Байысбаев және зиялы қауым өкілдері мен Қасымбековтар әулетінің құда-жекжаттары қатысты.
Мерекелік жиында алғы сөз алған Нұржан Жақсылықұлы жерлесіміз Нұрлыбай Қасымбековтың өмір жолы жастарға өнеге екенің айтып, ауданымызда бұқаралық спорттың дамуына сүбелі үлес қосып жүрген Қасымбековтар әулетіне аудан тұрғындары және өз атынан алғысын білдірді.
Айта кетейік, 15 ауылдық округ, кенттерден іріктеліп, финалдық кезеңге жолдама алған 11 команда орталық алаңда бас жүлдені сарапқа салып, жеңіс тұғырынан аудандық ардагерлер командасы көрінді.
Жүлделі 2-орынды Жаскешу мен Сәлік құрамаларынан жасақталған команда иеленсе, үздік үштікті Састөбе құрамасы түйіндеді.
Осылайша жастардан кем түспей, тартысты ойын өрнегін көрсеткен командалас ағаларымыз бен бауырларымыз, спортта шек жоқ екенің тағы да бір дәлелдеді.
Сонымен қатар, футбол спортынан бөлек шахматтан ардагерлер арасында турнир ұйымдастырылып, жеңімпаздар арнайы дипломдар мен бағалы сыйлықтармен марапатталды.