ЖАҢА БАЛАБАҚША АШЫЛДЫ

Шілде айының 16 жұлдызы күні Көксағыз ауылының тұрғындары жағымды жаңалықтың куәгері болды. Жасыл желек жамылған бұл елді мекенде бұрыннан аудандық білім бөліміне қарасты санаториялық-коммуналдық «Жансая» бөбекжай балабақшасы меңгерушісі Күмісай Жандаралықызы Үрістембекова жұмыс атқарып келген еді. Енді қазіргі заман талабына орай бұл жерде қосымша екінші топ ашылып, аталмыш бөбекжай ғимаратының ажары арайланып, ауқымы кеңейе түсті. Бүгінде мұнда 22 бала қабылданып, олар 5 мезгіл тегін тамақпен қамтамасыз етіліп отыр. Қосымша топта сонымен қатар, логопед, дефектолог мамандары да күнделікті қызметтерін атқаруда.
Көксағыз елді мекенінде орын алған осы қуанышты игі-шараның салтанатты ашылу рәсіміне қатысқан ауыл тұрғындары бөбекжайдағы қосымша топтың алда атқарар жұмыстарына сәттілік тіледі. Ауылдың көне көз қариялары өздерінің баталарын берді.