Биылғы жыл шаруалар үшін қолайлы жыл болып тұр. Көктемгі жаңбыр молынан жауып, егін бітік шықты. Осы сәтті шаруалар тиімді пайдаланып, егілген егіннен мол өнім алуды мақсат етіп отыр. Аудан шаруалары да мемлекет тарапынан берілетін мүмкіндіктерді барлық мақсатта пайдаланып отыр – дейді аудандық ауылшаруашылық және жер қатынастары бөлімінің басшысы Қ.Еркебаев.
Жалпы биылғы жылы Түлкібас ауданында 24 мың гектарға масақты дәнді-дақылдар егілген. Оның ішінде, 15,4 мың гектарға бидай, 8,6 мың гектарына арпа. Қазіргі таңда бұл дақылдардың 12,5 мың гектары орылып, осы уақытқа 29,8 мың тонна өнім жиналған. Бидайдың өнімділігі орта есеппен гектарына 25-30 центнерді, арпаның өнімділігі гектарына 22 центнерді құрайды.
Күре жол бойындағы Жаскешу ауылдық округіне қарасты «Борсықсай» шаруа қожалығы да астық орағына комбайндарын түсіріп, алғашқы орымын бастады. Бүгінде 2 комбайн астық орағында жұмыс істесе, оның бірі Беларусь елінен шыққан «Лида 1300» комбайн алғаш рет пайдаланып отыр. Шаруашылық басшысы Д.Мылтықбаев басқаратын шаруашылықта 300 га жер қорымы бар. Жаз мезгілін тиімді пайдаланып, егінді уақтылы жинап алуды шаруашылық жоспарлап отыр.
Суретте: аудандық ауылшаруашылық және жер қатынастары бөлім басшысының орынбасары А.Төлепбергенов пен «Борсықссай» шаруа қожалығының төрағасы Д.Мылтықбаев және комбайнерлері.