Негізгі мақсаты Қазақстанның коммуникативтік-ақпарат
жағдайында техникалық және кәсіптік білім саласындағы саңлағы атануды көздейтін аудандағы атаулы білім ошағын білмейтін азамат жоқ шығар. Түлектерге бәсекеге қабілеттілік пен сұранысты қамтамасыз ететін озық технологияларға негізделген жаңа тәжірибені қалыптастырып және оны дамыту жолында тіршілік жасап жүрген Түлкібас агробизнес және саяхат колледжінің бүгінгі тыныс тіршілігі қалай? Студенттер қаншалықты дәрежеде кәсіптік білімді меңгеріп, мамандықтары бойынша жұмыс істеуде? Ұстаздар еңбегі ақталып жатыр ма? Ауылшаруашылық саласы маманға тапшы деп шуласқан жұрттың сұрағына жауап іздеп Түлкібас агробизнес және саяхат колледжінің директоры Сержан Адилбеков мырзамен байланысқан едік. Әңгіме желісі төмендегідей өрбіді…
— «Жас маман» жобасымен тың серпін алған білім ұясының бірі өзіңіз басшылық жасап жүрген Түлкібас агробизнес және саяхат колледжі. Бәсекеге қабілетті мекемелердің бірі ретінде танылып жүрген білім ұясының бүгінгі хәлі қандай? (толық ақпарат)
-2024-2025 о.ж мемлекеттік тапсырыспен 293 білім алушы 11 мамандық бойынша оқуға қабылданды. Жылдан жылға колледжімізге түсем деушілер саны артып келеді. Бұл өсім тенденциясын колледждің МТБ нығаюымен және білім сапасының жоғарылауымен байланысты деп ойлаймын. Өткен оқу жылында колледж материалдық техникалық базасы Түркістан облысы білім басқармасы қолдауымен облыстық бюджеттен техникалық жабдықтармен жабдықталды. Бұл, колледж білім алушыларының біліктілік, қорытынды емтихандарын заманауи құрылғыларда демонстрациялық емтихандарын тапсыруға мүмкіндік беріп отыр. Сонымен қатар, колледж жылу жүйесі толық күрделі жөндеуден және жатақхана ағымдық жөндеуден өтіп білім алушыларға қолайлы жағдайлар жасалды.«Жас маман»жобасы аясында құрылған құзыреттілік орталық 2022 жылдан екі біліктілік бойынша «WSK Түркістан» чемпионатының облыстық деңгейдегі дайындық пен жарыстар алаңына айналып отыр.
— Қазіргі таңда қоғамдағы ең үлкен проблеманың бірі ауылшаруашылық мамандарының жетіспеушілігі. Бұл ақпарат өзіңізге де мәлім болса керек. Дәнекерлеуші, электр маманы, тігінші дайындау сіздердің құзіреттілігіңізге кіретін міндеттің бірі. Жалпы, бұл мамандықтарға жастардың келу деңгейі қалай?
— Жастарға кәсіби бағдар беру жұмыстары жүйелі жұмыс жасалуы тиіс деп ойлаймын. Колледж қызметкерлері оқу жыл бойы аудан бойынша ауыл округтарға бөлінген кесте бойынша жұмыс жүргізеді. Аудандық «Жастар комитеті», «Атамекен» кәсіпкерлік мектеп, «Мансап» орталық өкілдері кәсіби бағдар беру жұмыстарынаелеулі үлестерін қосып келеді. Нәтижесінде «Инженерия және инженерлік іс» және «өндірістік пен өңдеу» салалары бойынша мамандықтарға жастардың білім алуға келуі жоғары. Атап айтар болсақ, биылғы оқу жылына «Электржабдықтары (түрлері және салалары бойынша)» мамандығы бойынша 47 білім алушы, «Дәнекерлеу ісі (түрлері бойынша)» мамандығы бойынша 50 білім алушы оқуға қабылданды.
Ауыл шаруашылық саласы бойынша колледжде берілген мемлекеттік лицензиямызға сәйкес «Ветеринария» мамандары білім алуда. Мамандық бойынша білім алушылар саны артуда. Бітіруші түлектеріміздің жұмысқа орналасуы және теориялық білімнің өндірістік тәжірибемен байланысы аудан көлеміндегі әлеуметтік серіктестердің ықпалымен жоғары деңгейде қалыптасқанын атап айта аламын.
-БАҚ өкілдерімен басшы ретінде байланысыңыздың жоғары екенін білеміз. Қаншама облыстық, республикалық басылымдардан, телеарналардан колледж жайлы жақсы ақпараттар жарияланған мақалалар мен арнайы бағдарламаларды көріп келеміз. Колледж студенттерінің БАҚ-мен, шығармашылықпен байланысы бар ма?
— БАҚ-тың жастардың мінез-құлқына ықпал ету мәселесі қазіргі қоғамымызда өте өзекті деп есептеймін, өйткені бүгінгі таңда халықтың басым бөлігін жастар құрайды. Жастар – бұқаралық ақпарат құралдарын барынша пайдаланатын және әртүрлі мазмұндағы ақпаратты құлшыныспен қабылдайтын әлеуметтік топ. Колледж студенттері өз жетістіктері мен атқарған ізгі жұмыстарын БАҚ беттерінде жариялап отырады.
— Сұранысқа ие, мақтауға лайық колледждің алдағы жоспарлары қандай болмақ?
— Қазіргі таңдағы сұраныс әрі маңызды білім саласындағы мемлекеттік талап ол цифрландыру. Осы бағытта колледждің МТБ нығайту, кеңжолақты оптикалық интернет желісіне қосу, интернет жылдамдығын арттыру. Барлық арнайы пән, ЖБП кабинеттері, лабораториялық кабинеттер мен шеберханаларды заманауи жабдықтармен жабдықтау.Цифрлық оқыту мазмұны бар платформаларға қолжетімділікті қамтамасыз ету.Еңбек нарығына қажет ететін екінші мамандыққа кәсіптік техникалық білімі бар талапкерлерді қабылдауды жоспарлап отырмыз.
-Шешімі табылмай, шиеленісіп жатқан маңызды проблемалар болса, айтып өтсеңіз?
— Бірінші кезекте қазақ тіліндегі «Инженерия және инженерлік іс» саласындағы кітап жетіспеушілігін айтар едім.Гидротехникалық мелиорация, туризм, қонақ үй бизнесі мамандықтары бойынша мұғалім тапшылығы бар.Сонымен қатар балалардың денсаулығы, тамақтануы, тәрбиесі алаңдатады.
-Тікелей жастармен жұмыс жасау, оларға жол көрсету, өмірлік мақсатын айқындау жолында көмек беру- басшы ретінде сізге қаншалықты оңай немесе қиын?
— Кез келген елдің болашағы жастармен байланысты. Жастар бұрынғыны сыни көзқараста қабылдайды, тоқырауға шыдамайды, әрдайым өзгерісте болады.Жастар мен әлеуметтік орта әрдайым өзгеріп отырады. Жастар өмірлік тәжірибе жинай отырып болашақта елді алға жылжытатын жасампаз күшке айналады, болашақта өзінің тәжірибесін ұрпақтарына табыстайды. Әлеуметтік орта оларды тек биологиялық жағынан емес, әлеуметтік жағынан да дамытуы қажет.
Жастардың қажеттіліктері мен қабілеттерінің және әлеуметтік ортаның одан талап ететіні арасында қиыспаушылықтар көп. Мұндай қайшылық жастардың өзін-өзі дамытуы үшін кедергі жасайды,сондықтан да оларға қоғамның дамуына қатысуына қажетті жағдай жасау керек.
Бүгінгі таңда жастар қауымының еліміздің ішкі саясатындағы алатын мардымсыз үлесі олардың мемлекетті басқару процессінен алшақ. Білімді, әрі белсенді жастардың жоғарғы мемлекеттік билік орындарындағы басқарушы лауазымдарға тартылмауы, тіпті жастар ісімен айналысатын мемлекеттік органдарды басқарып отырған көптеген лауазым иелерінің жасы аталмыш категория қатарынан шығып кеткенін байқаймыз.
Кез келген қоғамның дамуы реформалардың іске асырылуы кезінде жастар өкілдерінің қатысуымен болғаны жөн.
— Жастарға айтар ақыл-кеңесіңіз, ұжымыңызға айтар алғысыңыз болса, мархабат.
— Жастарымыздың тірлікте қарын тойғызып, киім баққан күйбең тірліктен басқа абстракт дүниелермен өзінің тілегін қанағаттандырса,өмірлері мағыналы болары сөзсіз.Ұзақ болашақ пен көз алдағыны тең меңгере отырып, шынайы тұрмысты орната біліп, адам үшін қажетті шаттықтан айырылып қалмауы керек. Мұрат және қиялсыз өмір – босқа өткен өмір! Дүниедегі бәсеке мен өмір сүру сайысы барлық адамға ортақ. Сондықтан өзгелерден ақылың мен батылдығың арқылы озасың. Бұл өмір сүрудің кешірілмес заңдылығы, ондағы қамтылған біліміңді, ақыл-парасаттыңды өмірде пайдалана біліңдер дегім келеді.
Аяжан МӘМЕТ
