АРЫС АУЫЛДЫҚ ОКРУГІНІҢ ӘКІМІ АРДАГЕРЛЕРГЕ ҚҰРМЕТ КӨРСЕТТІ

Арыс ауылдық округі әкімі О.Сатыбалдиев және ардагерлер кеңесі төрағасы мен мүшелері тыл ардагері Панченко Николай Макаровичтің мерейлі 90 жасқа толуымен құттықтап, шаңырақтарына арнайы барды. Николай Макарович — ұзақ жылдар бойы Киров колхозында механизатор қызметін атқарып, округтің дамуына өзіндік үлесін қосқан ардагер. Туылған күні қарсаңында округ әкімінің бастауымен ерекше құрмет көрсетіліп, салтымызға сай иығына шапан жауып, ізгілік танытты. Сонымен қатар, ардагердің жұбайы Панченко Галина Николаевнаны да жаңа 2025 жылдың келуімен құттықтап, округ әкімінің атынан Алғыс хат табысталды. Қос қарияның көңілі балаша қуанып, ерекше алғыстарын білдірді. Округ әкімі мен ардагерлер алқасының көрсеткен құрметі оларды бақытқа бөлегенін жеткізіп, ақ баталарын жаудырды.
«Батаменен ер көгерер» демекші, алдыңғы буынды ардақтап, ардагерлерді қуантуға асыққан ынтымағы бекем, ауызбіршілігі ажырамаған округтің жасаған игі ісі көп жандарға үлгі болса демекпіз. Қарты бар елдің қазынасы да, берекесі де көп. Қарияларды құрметтеп, амандығында ақ батасын алып қалғанға не жетсін?!