АУЫЛҒА ЖАҢА ҚАҚПА ҚОЙЫЛДЫ

Жыл өткен сайын аудан аумағындағы елді мекендердің ажары ашылып, абаттанып, көркейіп келеді. Мемлекет тарапынан аудандағы барлық елді мекендерде жүйелі жұмыстар атқарылуда. Әсем табиғатымен көркем Түлкібас ауданының әрбір ауылы жанға жайлы, саф ауасы таза, бұлақ пен бастаулары тау баурайында орын тепкен. Сондай саялы ауылдардың бірі -Көкбұлақ ауылы. 1928 жылы Көкбұлақ артелі болып құрылған ауыл бүгінде көгілдір отын, ауыз су, электр энергиясы, жол, мектеп және балабақшамен толық қамтылған.
Көкбұлақ өзенінің бойында орын тепкен Көкбұлақ ауылында бүгінде 120 үй түтінін түтетіп отыр. Мемлекетке қол жаймай, өз бетінше еңбек етіп келе жатқан ауыл тұрғындары жұдырықтай жұмылып, көптеген үлгі істерге ұйытқы болып келеді.
Ауылдағы 1987 жылғы туылған түлектердің мектеп бітіргендеріне 20 жыл толуына орай белсенді жастар бірігіп, ортақ қаржы жинап, ауылға кіре беріске қақпа орнатып, ауыл келбетіне келбет қосып, көпке үлгі боларлық өнегелі іс жасады. Осынау игі іске ауыл тұрғындары ризашылықтарын білдіруде.