ӘЙГЕРІМ БАЙМЕШ: АЭС САЛЫНҒАН ЖАҒДАЙДА БІЗДЕ ДЕ КАДРЛАР БАР

— Мен Әйгерім Баймеш, Сәрсен Аманжолов атындағы Шығыс Қазақстан университетін ядролық физика факультеті мамандығы бойынша бітіргенмін. Курчатов қаласындағы ядролық зерттеу орталығынан практикадан өттім. Алматыдағы Ядролық физика институтында «Легирленген қоспалардың аустенитті тот баспайтын болаттардың механикалық сипаттамаларына және коррозияға төзімділігіне әсері» тақырыбында дипломдық жұмысымды қорғадым. Қорғаған жұмысым атом электр станциясы жобасына, оның келешекте жұмыс жасауына тікелей қатысты. Біздің елімізде атом электр станциясын салу мәселесі көп жылдардан бері талқыланып келеді. Мемлекет басшысы кезекті Жолдауында АЭС салу бойынша 6 – қазанда референдум өтетінін айтып, салмақты мәселені ел талқысына салатынын жеткізді. Өзім осы саланың маманы ретінде елімізде АЭС салынғанын құптаймын. Иә, қауіпсіздік мәселесі көпшілікті алаңдатады. Елімізде апат қаупін барынша азайтатын, қауіпсіздіктің барлық талаптарына сәйкес келетін, соңғы жетістіктер мен әзірлемелерді пайдалана отырып, жаңа буын ІІІ немесе +ІІІ атом электр станциясын салу қарастырылып жатыр. Жаңа буын реакторларының басты ерекшелігі – белсенді және пассивті қауіпсіздік жүйелерінің бірегей үйлесімі станцияны сыртқы және ішкі әсерлерге төзімді етеді.
Біздің елімізде уран қоры жеткілікті. Әлем бойынша уран қоры жөнінен екінші, уран өндіруден алдыңғы орындамыз. Неге осы мүмкіндіктерді өз елімізде пайдаланбасқа? Үлкен уран қоры бар Қазақстанда атом электр станциясының құрылысы ұзақ мерзімді негізде тұрақты және сенімді энергиямен қамтамасыз ететін энергетикалық қауіпсіздік, көміртегі іздерін азайту жолындағы маңызды қадам.
АЭС салынатын жағдайда кадр тапшылығы болмайды деген ойдамын. Мысалыға, мен ядролық физика маманы ретінде жұмыс таппай отырмын. Бүгінгі таңда, медицина орталығында рентгенолог болып қызмет етудемін. Университетті бірге бітірген қаншама білімді құрбы-құрдастарым әр салада қызмет етіп жүр. Кейбіреуі қосымша мамандықтар алуға мәжбүр болды. Өз мамандығы бойынша жұмыс болмағандықтан, білімдерін жетілдіріп, шетелге кетіп қалған достарым да бар. АЭС салынса, энергия тапшылығын болдырмаумен қатар, экономикамыз дамиды, кәсіпорындар көбейіп, жаңа нысандар бой көтереді. Біз секілді көптеген білімді жастарға тұрақты жұмыс орындары ашылар еді. Сондықтан, мен баршаңызды ел келешегі үшін маңызды қадамды қолдап, референдумға белсенді түрде ұйымшылдықпен қатысуға шақырамын.