Қоғамда тағдырдың тәлкегіне ұшыраса да, қиындыққа мойымаған жандар аз емес. Ауданда көз жанарынан айырылған жандарға қол ұшын созатын бірден бір ұйым бар. Ол «Қазақ соқырлар қоғамы» қоғамдық бірлестігі. Алғашқыда санаулы ғана жанның басын біріктірген ұйым бүгінде 66-ға жуық мүмкіндігі шектеулі жанды өмір сүруге бейімдеп отыр. Қарап отырсақ, дені сау адамдарға қарағанда мүмкіндігі шектеулі жандардың өмірге деген құштарлығы, қоғамдық жұмыстағы белсенділігі әлдеқайда жоғары келеді. Оған көп алысқа бармай-ақ аудандық «Соқырлар қоғамы» қоғамдық бірлестігіне барып, көзімізді анық жеткіздік. Зағип болып, жарық сәулені көре алмаса да, жүректегі мейірім сәулесімен күллі жаратылысқа жылуын шашып тұрғандай сезінесің. Сырты ескі ғимаратқа кірдім. Бірақ мекеменің басшысы Лаура Штапқызы жылы ілтипатпен қарсы алғандықтан, еш ызғарды сезбедім. Содан таныса келе әдемі әңгімемізді бастап кеттік.
-Лаура ханым, алдымен өзіңізді таныстырып өтсеңіз? Мүмкіндігі шектеулі жандармен қай уақытттан бері жұмыс жасап келесіз?
-Мен Абильдаева Лаура Штапқызы, Қызылорда қаласында дүниеге келдім. 1994 жылы осы Түлкібас ауданындағы Жамбыл колхозына келін болып түстім. Жолдасым, екі ұл, екі қызым бар. Қоғамға 2016 жылы мүше болып тіркелдім. Содан бері яғни 2018 жылға дейін қоғамда белсенді болып әр түрлі іс-шараларға қатысып сол жылдың 5 қазанынан бастап «Қазақ Соқырлар қоғамы» бастауыш ұйымына төрайым боп сайландым.
— «Қазақ соқырлар қоғамының» басты мақсаты?
-Қазақ соқырлар қоғамының басты мақсаты: Мүмкіндігі шектеулі 1-2 топ зағип жандардың рухани деңгейін көтеріп қоғам өміріне тарту. Зағиптардың құқықтары мен заңды мүдделерін қорғау, қамсыздандыру, еңбекке қосу. Спортпен айналысып салауатты өмір сүру, өмірге деген көзқарасын өзгерту. Қолөнерлерін, ән айтып би билеу сияқты өнерпаздарды жарыстарға тарту. Қазіргі таңда бізде ауданаралық өнерпаздар өнерлерін көрсетіп облыс көлемінде танылып жатыр. Мысалыға Нұрхожаева Тоқтамыс өз өнерін көрсетіп домбырамен, гитарамен ән шырқап басқа облыстарға барып танылып жүлделі болып жүр.
-Биыл «Қазақ соқырлар қоғамдық» бірлестігіне 87 жыл толып отыр. Осыған орай іс-шаралар ұйымдастырылды ма?
-Иә, биыл Қазақ Соқырлар қоғамына 87 жыл толып отыр. Осыған орай Түлкібас ауданындағы Жұмыспен қамту және әлеуметтік бағдарламалар бөлімінің жанынан ашылған «Белсенді ұзақ өмір» және «Тең қоғам» әлеуметтік қызметтер көрсету орталығында І, ІІ –топтағы көру қабілеті нашар спортшылар арасында шахмат, дойбы, тоғызқұмалақтан ашық спартакиадасы өтті. Аталмыш шараның мақсаты — облыста мүгедектердің арасында салауатты өмір салтын қалыптастырудың маңызды әлеуметтік, психологиялық және оңалту факторы ретінде дене шынықтыру және спортпен айналысуды насихаттау, көру қабілеті зақымданған мүгедек спортшыларды да спортпен белсенді айналысуға тарту болып табылады. Байқауға Сайрам, Төлеби аудандарынан спортшы зағип жандар қатысты. Осы жарыста жеңімпаз болып шахматтан Коваленко Любовь Фоминична, тоғызқұмалақтан Кенжетаев Жаңабай, дойбыдан Успанова Клара Түркістан қаласына іріктілеп жарысқа барып жеңімпаз боп қайтты.
-Біраз жыл бұрын ғимарат жаңадан бой көтереді деген жаңалықты естіп едік?
-Ғимарат жайлы айтсам құлағалы ескіріп тұр. Бірақ мемлекеттен қаржы бөлінбей тоқтап тұр. Демеуші де болмай жатыр. Қашан кім көмек беретінін білмей отырғанымызға біраз жыл болды. Осы ауданымыздың зағип жандары жиналып бас қосып отырып түрлі іс-шаралар өткізетін орынға, яғни көмекке мұқтаж болып отыр.
-Аудан бойынша зағиптар қоғамының неше мүшесі бар?
-Аудан бойынша 150 ден аса көз мүгедектегі бар зағип жандарды қабылдау керек еді, алайда мекеменің іші кішкентай әрі тар болғандықтан 66 адамды ғана тартып отыр.
-Мүмкіндігі шектеулі жандарға қандай жағдай жасалған?
— Мүмкіндігі шектеулі зағип жандарға аудан көлемінде жүріп тұруға мемлекеттен қарастырылған әлеуметтік такси берілген. Оған медицина орталығының шешімімен белгіленген кісілер пайдаланады және де бізде биыл жаңадан тең қоғам белсенділер орталығы ашылған. Онда спорт түрлерімен шұғылданады. Әртүрлі медициналық көмек алады.
-Алда қандай атқарылар жоспарларыңыз бар? Бөлісіп отырсаңыз?
-Алдағы уақыттағы жоспарымызға келсек 13 қараша Дүниежүзілік зағиптар мерекесін өткізу. Жылдағы дәстүр бойынша бұл мереке ауданымыздың әкімшілігімен райсобездің демеушілігімен марапаттау мен сыйлықтар беріп зағип кісілердің өнерін тамашалап концерттік бағдарлама беріп, қолөнерлерін тамашалайтын боламыз.
— Сұхбатқа арнайы уақыт бөлгеніңіз үшін алғыс білдіремін!
Осылай аз уақытта құрылған сұхбатымыздан кейін мынандай ойға келдім. Зағип жандардың өмір сүру сапасын жақсарту және аудандық қоғамдық, мәдени өміріне белсене қатыстыру, шығармашылық қабілеттерін арттыруға мүмкіндік беру арқылы кеуде қуанышын сыйлау жұмыстары тұрақты жүргізіліп отыр екен. Ал, енді тек ғимарат жаңаланса нұр үстіне нұр болар еді деп ойын ашып айтып қалған мекеме басшысының мәселесі назарға алынар деген ойдамын. Жомарт жандар барда мекеме жаңадан бой көтеретіне сенімдіміз. Бүкіл қоғам болып мүмкіндігі шектеулі жандарды қолдау – біздің баршамыздың азаматтық міндетіміз! Олар өмірге өкпелі емес. Жүрек түкпіріндегі мейірім нұрымен өмір сүреді. Мына өмірге ғашық. Иә, тағдырдан қанша төпеу көрсе де, ешкімге ренжімейді. Әлемді алақанмен көреді, саусақпен сезеді. Қазақ қоғамы да оларға кедергісіз келешек қалыптастырып, көз жанарынан айырылған жандардың қоғамның бір мүшесі ретінде белсенділік танытуына барынша жағдай жасау керек. Барша көзі әлсіз көретін азаматтарды келе жатқан атаулы мерекесімен құттықтай отырып, отбасыларына амандық, дендеріне саулық тілеп, қоштасып кете бардым.
Күн НҰРЫ.
