АРДЫҢ ЖҮГІН АРҚАЛАҒАН АЗАМАТ

Қазіргідей күрделі де, қымбатшылық салтанат құрып тұрған мына заманда қоғамымызда, жан – жағымызда жаныңа жан шуағын төгіп тұратын жақсы адамдардың көп болғаны қандай жақсы. Дегенмен, ондай ақкөңіл де мейірімді жандар арамызда бар ма, өзі деген көкейді мазалаған көңілсіздеу сауалдардың да кейде бой көрсетіп қалатыны жасырын емес қой. Нарықтық дәуірден қалған азырақ назымыз бар, заманымыздың түлкінің құйрығындай мың құбылып тұрғаны тағы бар. Бүгінде кез келген көк аттының жүзіне сүйсіне емес, күмәнмен қарайтын дәрежеге жеткеніміз де құпия болмай қалды. Жайдары да жүзі жылы жандар, иманды да салиқалы кісілер дегендеріміздің өзін қалай түсінеміз? Иә, кімнің жақсы екенін қалай бағалап жүрміз? Ақиқатына көшсек, кім өзін жаманмын деп нық сеніммен айта алады…
Түлкібас ауданының Құрметті азаматы, есімі жалпы Майлыкент өңіріне кеңінен танымал азамат, «Тұрар Рысқұлов автобус паркі» жауапкершілігі шектеулі серіктестігінің директоры Қалмахан Мамытбекұлы Сексенбаев жайлы мақала жазу біздей күнделікті қағаз-қалам кеміріп жүрген пақырдың еншісіне тиген кезде жоғарыдағы жақсы адам жайлы ойларға қатты беріліп кететініміз де рас. Өйткені, өзім сырттай болса да жақсы білетін кейіпкерімнің бүкіл бітім-болмысын, адамгершілік қасиетін, өнегелі өмір жолдарын ақ қағаз бетіне қаз-қалпында түсіріп, оны шынайы қалпында ойлы оқырмандарға жеткізу оңай шаруа еместігін жақсы білемін. Бір жақсы жері, мені бұл тығырықтан Қалмахан Мамытбекұлының өмірінен сыр шертетін құнды құжаттары мен түрлі басылым беттеріне шыққан мақалалары, суреттері шығарып алды. Енді сол жансыз құжаттардың кілтін тауып, оқырман қауымға жеткізуге бел буып отырған жағдайым бар. Ал, кеттік ендеше…
Қалмахан Мамытбекұлы Сексенбаев 1961 жылы қазан айының тоғызыншы жұлдызы күні Түркістан облысы, Түлкібас ауданы, Калинин (қазіргі Қожамберді) ауылында дүниеге келді. Қарт Қаратаудың етегіне қоныс тепкен аядай ғана шағын ауылда оның қайта оралмас бақытты балалық шағы мен жастық кезеңі табиғаты тамаша осы көрікті жерде өтті. Ұлы Отан соғысының ардагері, қарт майдангер, асқар таудай әкесі Мамытбек Сексенбайұлының тәлім-тәрбиесін жастай бойына сіңіріп, еңбекке ерте араласқан Қалмахан сабақты жақсы оқыды. Үлкенді сыйлайтын, ауылда тұратын жағдайлары нашар отбасыларға, жетім-жесірлерге қашанда қол ұшын беруге бала кезден қалыптасты. Ол Майтөбе елді мекеніндегі Гагарин атындағы орта мектепі ойдағыдай бітіріп шыққан соң, Шымкент қаласындағы автомеханикалық техникумға құжаттарын тапсырды. Бала кезінен техникаға бір табан жақын болып өскен Қалмахан аңсаған арманына қол жеткізу үшін аталмыш техникумда да ерекше көзге түсіп, озат оқушылардың қатарынан орын алды. Одан әрі жүрегі қалаған мамандығына қол жеткізіп, еңбек етіп, едәуір өмірлік тәжірибе жинақтаған соң білімін одан әрі жетілдіру мақсатында М. Әуезов атындағы мемлекеттік университетке оқуға түсіп, экономика факультетін бітіріп шықты.
1988 жылы қараша айының екінші жұлдызында мамандығына сай №1 Шымкент автобус паркіне жұмысқа тұрды. Бұл жерде де жас маман өзінің жайдары мінезімен, қарапайымдылығымен, еңбек сүйгіштігімен көзге түсіп, ұзамай қызметтік дәрежесі де көтеріле бастады. Арада біраз жылдар өткенде ол өз ісінің нағыз шебері екенін дәлелдей білді. 1996 жылы Қ. Сексенбаев Түлкібас ауданындағы «Ванновка жолаушылар тасымалдау» мекемесіне директордың орынбасары қызметіне бекітілді. Кейін бұл мекеме «№16 Т.Рысқұлов автобус паркі» деп аталғанда біздің кейіпкеріміз осы жауапкершілігі шектеулі серіктестігінің тізгінін ұстады. Міне, содан бері ол аталмыш мекемеде жемісті қызмет атқарып келеді.
Осы уақыт аралығында Түлкібас ауданында талай игілікті атқарылды. Талай жан жадыратар іс-шаралар жүзеге асты. Әрине, ол іс-әрекеттердің барлығы көліксіз шешілмейтіні белгілі жағдай. Аудан көлемінде атқарылып жататын ол үлкенді-кішілі іс-шаралардан Қалмахан Сексенбаев басқарып отырған «Т. Рысқұлов автобус паркі» жауапкершілігі шектеулі серіктестігінің күні бүгінге дейін шеткері қалған жері жоқ. Ауданға ат басын тіреген лауазымдары жоғары, мәртебелі меймандарды көліктермен қамтамасыз ету, оларды облыс орталығына, көршілес Таразға, Алатау баурайындағы Алматыға жеткізіп салу бұл автопарк ұжымы үшін үйреншікті жағдайға айналып кеткені қашан… Сонымен қатар, ауданда құрылған «Қайырымдылық», «Қамқорлық» қорлары аясында аудан көлеміндегі қазыналы қарттарды, асыл әжелерді, мектеп оқушыларын жылда облыс аумағындағы қасиетті де, киелі жерлерге саяхатқа, зиярат етуге апару жұмыстарын негізінен «Т. Рысқұлов автобус паркі» жауапкершілігі шектеулі серіктестігінің атқаратыны баршаға аян.
Ауданды әр жылдары басқарған Жеңісбек Мәуленқұлов, Асқар Бейсенбаев, Қалыбек Алдабергенов, Дархан Мыңбай, Ерғали Сарманов, Қайрат Әбдуалиев, Нұрбол Тұрашбеков, Нұрлан Байғұт, Нұржан Ізтілеуов секілді әкімдермен жақсы қарым-қатынас орнатып, олардың сенімінен шыққан Қалмахан Мамытбекұлы одан басқа да кездескен қиыншылықтарға мойын ұсынбай барынша жерлестерінің сенімінен шығуға талпынып келеді. Макаренко атындағы жалпы орта мектебінің жанындағы жетім-жесір, тұрмысы төмен отбасылардың балаларынан тұратын интернаттағы оқушыларды жылда еліміздегі көрікті жерлерге, киелі мекендерге саяхатқа апару да «Т. Рысқұлов автобус паркі» ЖШС-на жүктелгені бекер болмаса керек. Мұнан бөлек, мүгедек жандарды, қарт кісілерді, әжелерді де бөле жармай олардың айтқан талап-тілектерін орындауды да біздің кейіпкеріміз өзінің азаматтық борышым деп санайды. Сонымен қатар, жылда «Т.Рысқұлов автобус паркінде» ұзақ жылдар еңбек етіп, зейнетке шыққан көлік жүргізушілердің бастарын қосып,өмірден озған көлік жүргізушілердің рухтарына құран бағыштап, зиярат етіп тұратынын да жерлестері жақсы біледі..
Әрине, ұзақ жылғы адал еңбегі Қалмахандай азаматтың текке кеткен жоқ. Туған жерінің түтіні қашанда түзу шығуы үшін бойындағы бар қарым-қабілетін, күш-жігерін аямаған оның осы аралықта Құдай қосқан қосағымен тату-тәтті ғұмыр кешіп, алтын асықтай төрт перзентінің асқар таудай әкесі, олардан тараған қылықтары балдай тәтті төрт немересінің сүйікті атасы атанып отырған жағдайын да айта кетсек, артықтық болмас. Ұйымдастырушылық қабілеті мол, іскер басшы, Түлкібас ауданының Құрметті азаматы Қалмахан Сексенбаев «Қазақстан Тәуелсіздігіне 10,20,30 жыл», «Шапағат», «Түлкібас ауданына – 90 жыл» медалдарымен, ҚР Көлік және коммуникациялар министрлігінің «Құрметті автокөлікші» төс белгісімен, «Аманат» партиясының төрағасы Е. Қошановтың Құрмет грамотасымен, облыс, аудан әкімдерінің Алғыс хаттарымен, Мақтау қағаздарымен, екінші, үшінші дәрежелі дипломдарымен, Құрмет грамотасымен, ҚР автомобиль көлігі мен жол кәсіпорындары кәсіподағының заңды тұлғалар бірлестігінің Құрмет грамотасымен, аудандық мәслихаттың Құрмет грамотасымен марапатталған.
Бір сөзбен айтқанда, зейнеткерлік жас – 63-ке толып отырған Қожамберді ауылының тумасына: «Қуанышты күніңіз құтты болсын, ұзақ жылғы еткен адал еңбегіңіздің мәуелі жемісін көре беріңіз. Деніңізге саулық, отбасыңызға амандық және бойыңыздағы бар күш-қуатыңызды, қарым –қабілетіңізді туған жеріңіздің көркеюіне, гүлденуіне аянбай жұмсай беріңіз», — дейміз. Шынында да жақсы адамдардың арамызда көп болғаны қандай жақсы!
Орынтай КӨМЕКОВ,
Қазақстан Журналистер
Одағының мүшесі.