Бүгінгі таңда өз күшімен кәсіп бастап, оны дөңгелетіп, жақсы табысқа кенеліп жүрген жастар аз емес. Өздерінің идеяларын жүзеге асырып, ойдан іске көшуде асқан ұтқырлық танытатын кәсіпкерлердің саны артуда. Сондай бизнес иелерінің бірі — Сапарова Жанна Құлмағанбетқызы өз жолы туралы айтып берді. Аудан орталығынан гүлдер дүкенін ашқан нәзік жанды ару бүгінде табысты кәсіпкер. Кейіпкеріміздің әңгімесін өз сөзімен бастауды жөн көрдік.
— 2022 жылы қолда бар 800 мың теңгемен кәсіп бастадық. Түлкібас ауданы шағын болғандықтан, мұнда гүл сататын дүкендер бар, бірақ көп емес. Той-томалақта, туған күндерде, тағы басқа мерекелерде әдемі , қолжетімді, ауқымды гүл дүкеннің жоқтығы білінетін. Сонымен жұбайым Бауыржан екеуміз біраз ойландық, бизнестің сызбасын талқылап, ақыры іске кірісіп кеттік. Отбасылық кәсіп болғандықтан ер азаматымның қолдауы мені жігерлендірді. 2022 жылдың 23 мамырында «Gulmarket» дүкені өз жұмысын бастады. Ашылуы да, дамуы да толықтай өзіміздің қаражатымызға жасалған. Барлық гүлдерді салқын суда, салқын бөлмеде сақтаймыз. Күнделікті күтім жасаймыз. Олай болмаған жағдайда, гүлдер ұзаққа шыдамайды. Орта есеппен 10 мың теңгеге жақсы букет ала аласыз. Осы тұста айтарым, келген клиентті күліп қарсы алып, сөйлесіп, қалауын анықтап, шын ниетпен жұмыс істеу керек. Ал жай ғана «иә» немесе «жоқ» деп отырып алсаң көгермейсің, көпке бармайсың, -дейді жүзі нұрлы Жанна Құлмағанбетқызы.
Дүкеннің ашылғанына 3 жыл болса да, тұтынушыларға түрлі жеңілдіктерде қарастырылып тұрады екен. Барлық гүл түрлері кейде нарықтағы бағадан 10-15 пайызға арзанға сатылымға шығып жатады. Раушан гүлдері 600-1000 теңгеге дейін ұзындығына байланысты. «Gulmarket» дүкенінен раушан гүлдер, гортензия, хризантема, гипсофила, гербера, астра, лилья сияқты хош иісті ал қызыл гүлдерді кездестіресіз. Көбінде осы раушан гүлдері мен гортензия хризантема және үй гүлдеріне сұраныс көп. Гүлдер Голландиядан тікелей тапсырыс арқылы алынса, ал бөлме гүлдері Түркістан, Шымкент қалаларынан жеткізеледі екен. Аталмыш дүкенде 2 флорист жұмыс жасайды. Гүлдің өзімен қоса, таңдаған түсіне қарап оны сыйға тартқан адамның сезімін, көзқарасын білуге болады. Мәселен, гүлдің түсі алқызыл болса, ол жастықты, ибалылықты білдіреді. Ал қызыл гүл — құмарлық пен махаббаттың белгісі. Сары түс — күн шуағы, байлықтың нышаны болса, жауқазын қыз балаға нәзік гүлдерді сыйға тартады екен. Кәсіп иесі сұхбат барысында осындай ойымен бөлісті. Сондай-ақ, дүкен сөрелерінде десте гүлмен бірге, бөлме гүлдері, түрлі ойыншықтар, әйелдер мен ерлерге арналған арнайы сыйлық қобдишалары да көзге шалынды.
«Gulmarket» дүкенінің жарнамасы әлеуметтік желі арқылы жасалынады. Жаңа бейнежазбалар, жаңа форматта қолдануда барынша креативке жүгінеді. Өз ісіңді бастау, жүргізіп, дөңгелетіп әкету, нарыққа кіріп, клиенттік база қалыптасыру оңай шаруа емес. Өнімді сапалы етіп жасай алумен қатар оны сата алу өнері де маңызды. Гүлді баптап өсіру, күтімін жасау екінің бірінің қолынан келетін іс емес. Себебі гүл көп нәрсені ұната бермейді. Тіпті гүл қоятын орынды да алдын ала таңдап алу керек.Судың көп ішпейтінін, салқын жерді ұнатпайтынын жапырағындағы өзгерістен бірден аңғаруға болады. Жалпы гүл өсірудің қияметін мамандары жақсы біледі. Ал үйдегі қырық шақты гүлден бөлек гүл өсіру ісін кәсіп қылу қиынның қиыны. Одан да өзге түрін таңдаған тиімді ме дерсіз. Қай іске де махаббат керек. Алайда осы ерекше гүлдермен айналысып жүрген Жанна жанына жалау екенін әрі махабатпен жасайтынын жеткізді. Жанна Сапарованың негізгі мамандығы медбике. Түлкібас аудандық орталық ауруханасында жұмыс жасай жүре, жолдасы экономист бола тұра осы кәсіпті қатар алып жүру ерлі-зайыпты үшін үлкен жауапкершілікті танытатын айтты. Осындай пысықтығымен, ептілігімен тек алға жүруді ойлайтын бес перзентінің аяулы ата-анасы Бауыржан мен Жанна бүгінде бақытты отбасы.
Біздің бір байқағанымыз, «Gulmarket» дүкеннің тауарлары аудан тұрғындарының көңілінен шығып үлгерді. Жұмыстарыңызға сәттілік тілеп, әр бір тұтынушы құлпырған гүлдеріңіз арқылы ерекше қуанып, бақытқа бөлене берсін. Жемісті күндеріңіз көп болғай деп тілегімізді арнаймыз.
