ӘЖЕЛЕРДІҢ КӨШПЕЛІ СЕМИНАРЫ АРЫС АУЫЛДЫҚ ОКРУГІНДЕ ЖАЛҒАСТЫ

Аудандық әжелер алқасының төрайымы Гүлбүбі Ешенқұлованың бастауымен әжелер Арыс ауылдық округіне көшпелі семинар бойынша барды. Бұл жолғы семинар «Қыз тәрбиесі-ұлт тәрбиесі» деген тақырыпта ойысты. Арыс ауылдық округі әжелер алқасының төрайымы Күміскүл Тұрсынбекованың ұйытқы болуымен ұйымдастырылған семинарға ақ әжелер тобынан бөлек, ардагерлер алқасының мүшелері және Аналар кеңесінің мүшелері де қатысты. Әр ауылдық округтен келген ақ әжелер тобын ауыл әкімдігі аппаратының мамандары күтіп алып, «Нар Апа» деп аталатын өндірістік зауытына алып келді. Мұнда алма шырынын дайындауға қажетті шикізатты өндіреді екен. 3 сорттағы алманы 35 теңгеден қабылдап, зауыттың жұмысын ілгерілетіп отырған кәсіпкер азаматтар шырын шығарудағы техникаларымен бөлісті. Арыс ауылдық округі өндіретін бұл шикізатты Өзбекстан, Қырғызстан, Ресей елдеріне экспорттайды екен. Сұранысқа ие шырынды ішіп, әжелер істеріне береке тілеп, баталарын берді.
Әрмен қарай әжелер «Мерей» бөбекжай балабақшасына табан тіреді. Ауласы кең, тап-таза, әсем гүлдермен ажарландырылған балабақшасының сырт келбеті кімді де болмасын тамсандыратыны анық. Ұжым мүшелері ауданнан келген алқалы қонақтарды кіре берістен құшақ жайып қарсы алып, ілтипаттарын танытты. Бүлдіршіндермен бірігіп, тәрбиеші педагогтар арнайы концерттік бағдарлама ұсынды. Онда балапандар «Әже» деп ән шырқап, педагог мамандар мен бүлдіршіндер бірігіп “Ана қадірі” атты көріністі сахналады. Бұл қойылымның жүрекке жеткендігі, мағынасының соншалықты тереңдігі болса керек, келген қонақтар көздеріне жас алып, бір сәт ойға шомды. Балабақшадағы жиын соңында Гүлбүбі Ешенқұлова сөз алып, керемет кеш ұйымдастырып, ізгі ілтипат танытып жатқан бөбекжай ұжымына алғысын білдірді.
Тамаша көңіл күймен балабақша ұжымымен қоштасып, «Family Resort» демалыс аймағына аялдама жасадық. Күні бүгінге дейін демалыс аймағы болып саналған бұл ғимарат енді балалар лагеріне айналған көрінеді. Биылғы жылы республиканың түкпір-түкпірінен қаншама бала келіп, жазғы демалыстарын Керейт ауылында көңілді өткізген екен. Қазіргі таңда мұнда демалушылар арнайы келіп, уақыт өткізеді. Балық аулап, дайын ас мәзірімен азықтанып, тамаша демалыс өткізуге мүмкіндігі мол.
Ең соңғы қорытынды кеш Керейт ауылдық мәдениет үйінде өтті. Онда ауылдық ардагерлер кеңесінің төрағасы Оразбек Дәулеталиев сөз алып, келген қонақтарға жылы лебізін білдіріп, қыз баланың қоғам үшін маңызды екенін тіліне тиек етті. Сосын әсем әнмен Күміскүл Тұрсынбекова ортаға шығып, кештің ажарын кіргізді. Мектеп оқушылары әннен шашу шашып, түрлі ұлттың ұлттық билерін нақышына келтіріп орындады.Арыс ауылдық округінің әжелер алқасының төрайымы Күміскүл Тұрсынбекова ауыл әжелерімен бірігіп отбасылық құндылықтарды дәріптейтін қойылымды көрсетті. Ал, мектеп оқушылары “Қыз тәрбиесі ұлт тәрбиесі” тақырыбында дебат ұйымдастырды. Көрініс те, ән де, күй де орындалған тамаша кештің куәсі болдық десем артықтық болмас. Басқосу соңында Гүлбүбі Ешенқұлова апайымыз сөз алып, қыз баласының тәрбиесі қоғам үшін өте маңызды екенін айтып, тәрбиеге, өнегеге көп назар салу керектігін ескертті. Осындай семинар жиындардың жиі өткізіліп тұруы, бүгінгі ұрпақтың тәрбиесінің оң болуына ықпалы барын айтып, ауызбіршілікке шақырды. Ауылдық округтің әкімі Олжас Сатыбалдиев жиын соңында ардагерлер қауымы мен ақ әжелер тобына алғысын білдіріп, қашанда қолдау білдіретін айтты. Керемет семинар осындай өнегелі іспен аяқталды.
Аяжан МӘМЕТ.