КӨЛІК ЖӨНДЕУ ДЕ КҮРДЕЛІ ІС

Қазір көлікке қатысты кәсіп түрлері сұраныста. Сан түрлі көліктің модельдерін жөндейтін шеберлер де қолдан-қолға тимейді. Себебі, елімізде көлік тізгіндейтіндер күннен –күнге артып келеді. Бүгінде техника мен ғылымның дамыған уақытында көліктің қажеттілігі орасан зор. Себебі адамдар көліктің көмегімен жұмысқа уақытымен барып, шаруаларын жылдам ыңғайлайды. Осыны ескерген түлкібастық тұрғындар бизнеске бет бұруда осы бағытты таңдап отыр. Бірі, көліктің жабындыларын тігіп, заман талабына сай етіп әспеттесе, енді бірі түрлі техникалық қызметтер ұсынады. Қайсысын болса да тұтынушылар көп. Темір тұлпар иелеріне қызмет көрсетіп, шаруасын дөңгелетіп отырғандардың бірі аудан тұрғыны Бейсенов Досжан Пернебекұлы. Жасынан техникаға, темір-терсекке жақын өскен ол өсе келе ақыры көлік жөндеп, нәпақасын тауып жүр. Нарық заманында кәсіптің көзін тауып, өз істерін дөңгелетіп, ойға алған ісін жүйелі түрде жүзеге асыру кез-келген адамның қолынан келе бермейтіні ақиқат. Кәсіпкер жұмылдырған қаржысымен, сонымен бірге ол өз уақытымен, еңбегімен, тіпті, өзінің іскерлік атағымен да тәуекелге барды. «Тәуекел – түбі желқайық, өтесің де кетесің» демекші кейіпкеріміз Бейсенов Досжан осындай жандардың қатарында. Ол көлік жөндеу ісімен айналысу арқылы ел алғысына бөленіп жүрген өз ісінің хас шебері.
Кәсіпкер Досжан 2024 жылдың маусым айында «Еңбек нарығын дамытудың 2024-2029 жылдарға арналған тұжырымдамасы» аясында «Мемлекеттік қайтарымсыз грант» алған. Қазіргі таңда бизнес жобасына сәйкес «СТО» кәсібін өрбітіп отыр. Грант қаражатының яғни 1 млн.477 мың теңгені бір тиынына дейін тиімді жұмсаған кейіпкеріміз шаруашылығын жүргізуге арналған түрлі құрылғы, саймандарын сатып алған. Пайдасы орасан болса да бұл құралдарға қолы жетпей жүрген шеберге қазір тапсырыстар да көбейген. Себебі, алған құрал жабдықтары соңғы маркалы жаңа көліктерге арналған. Көлік дөңгелектерін жөндеу, теңестіру сияқты бірқатар қызметтерді көрсетіп, көпбалалы әке отбасын асырып отыр. Осылайша мемлекет қолдауының арқасында қолынан келетін ісін одан әрмен дамытып отырған Досжанның еңбекқорлығына, ізденісіне ауыл-аймақ тұрғындары сүйсініп отырады.
1980 жылы Шақпақ баба ауылында дүниеге келген Досжан Пернебекұлы 30 жылға жуық уақыттан бері көлік жөндеумен айналысып келе жатқан білікті маман. 2008 жылы орталыққа қоныс аударды. 5 перзенті, аяулы жары бар бақытты отбасы. Бастапқыда өзінің қаражатына бастаған ол, мемлекеттен берілген көмекті өзіне берілген сый деп біледі. Мемлекет тарапынан тағы да қолдау болса, кәсіптің шеңберін үлкейту жоспарда бар. Орталық ыңғайлы жерде орналасқан. Қызметте­ріне сұраныс мол. Еңбегімен бағы жанып, халықтың пайдасына жараған осындай елдің азаматтары жарқын болашақтың кепілі.
-Қазіргі қоғамда еңбек етемін деген жанға мүмкіндіктер өте көп. Ынта болса екі қолға бір күрек оңай табылатын заманда, жан-жақтан көмек күтпей-ақ, өз бетіңмен еңбектеніп, үлкен белесті бағындыруға толық жағдай бар. Қандай да шағын кәсіп болмасын, оның қыр-сырын білу үлкен ізденісті қажет етеді. Мен көлік жөндегенді бала кезден қызығушылықпен жасайтынмын. Бүгінде ол арманым орындалып, кәсібімді жүргізіп, бала-шағамды бағып отырмын. Күніне шамамен 2-3 көлікті жөндеп бітіремін, егерде моторын ауыстыратын болсам 2-3 күнге созылып кетеді. Өйткені, керек құрал саймандарын Алматы болмаса Қытайдан алдырып жатамыз. Негізгі жабдықтарды Шымкент қаласынан алдыртып отырамын. Мысалыға моторды жөндеу жұмысы 60-70 мың. Тұрақты тұтынушыларыма майын тегін ауыстырамын. Кейде суын, тосолын тегін құйып беремін. Одан бөлек қозғалтқыштарын жаңадан жинап, шығарам. Кәсіппен айналысқанның бір пайдасы ешкімге бағынышты болмайсың, еңбегіңе қарай табысың да арта береді, — дейді жомарт Досжан.
Шыны керек, «кез келген адам кәсіп жасай алады» деген жаңсақ пікір. Өйткені, әр адамның дүниетанымы, ой-өрісі әр түрлі. Алайда, елімізде «кәсіппен айналысамын» дегендерге мемлекет тарапынан қолдаулар жеткілікті. Тек икемің келетін істі тауып, соны ұршықша иіріп алып кету қажет. «Заманға қарап, бөркіңді ки» демекші, уақыт талабына сай кәсіппен айналысып жүрген біздің кезекті кейіпкеріміз Досжан Пернебекұлына арналып айтылғандай. Заман талабына сәйкес техника жөндеу орталығын жаңаша жабдықтап, түрлі тетіктердің кілтін дөп басқан мамандардың қызметіне жүгініп жүрген халықтың барлығы дерлік ризашылықтарын білдіруі сапалы қызметтің жемісі екендігі сөзсіз. Жаңа мүмкіндіктерді іздеп, жаңа технологияны пайдаланып, өз жұмыстарына жан-тәнімен беріліп, көпшілікке қалтқысыз қызмет ететін осындай кәсіпкердің қатары күннен-күнге көбейе берсе екен дейміз!
Күн НҰРЫ.