Жарық дүниенің есігін жаңа ашқан әр бір адамзат баласының өсе келе ең алдымен өзінің адал еңбегімен, іскерлік қабілетімен, өнегелі өмір жолдарымен артына өшпестей із қалдыруға ұмтылатыны әрине, заңды құбылыс. Оның үстіне ол адамның жақсы жағы туған жеріне, өскен еліне есімінің кеңінен мәлім болмағы – кез-келген жанның қолынан келе бермейтіні тағы бар. Қарапайым да дана халықтың елге сыйлы, екі сөйлемейтін, құрғақ сөзден гөрі іске берік абыройлы азаматты қашанда айрықша құрмет тұтатыны да сондықтан болса керек. Ал, асылы мен жасығы, жақсысы мен жаманы бір-бірін жеңе алмай итжығыс түсіп жататын мына өмір атты толғауы тоқсан тіршіліктің жолында «малым – жанымның садағасы, жаным- арымның садағасы» деген әлімсақтан келе жатқан ата – бабалар аманатына адал болып, тұла бойындағы адамгершілік, ізгілік қасиеттеріне дақ түсірмей жүретін жандардың арамызда бұдан да көбірек болғаны қандай жақсы. Біз білетін осындай азаматтардың бірі, үстіміздегі жылдың 2-ші ақпанында пайғамбар жасы – 63-ке толғалы отырған есімі бүкіл Майлыкент өңіріне кеңінен танымал, Түлкібас ауданы әкімінің орынбасары Марат Сүгірәліұлы Жанесен деп айтсақ, одан онша қателесе қоймасымыз анық.
1962 жылы ақпан айының екінші жұлдызы күні Марат Сүгірәліұлы Жанесен Оңтүстік Қазақстан облысы, Түлкібас ауданы, №117 разьезде теміржолшы отбасында дүниеге келді. Балалық шағы мен жастық кезеңі осы шағын ғана ауылда өтті. Асқар таудай әкесі Сүгірәлі Әшірбекұлы нағыз қарапайым еңбек адамы болатын. 14 жасында соғыстың қызып тұрған кезінде аудандық «Социалистік егінші» газетінде әріп теруші, кейінірек корректоры болып жауапты қызмет атқарған жасөспірім одан кейінгі жылдары уақытпен санаспай бүкіл әлемге үрей туғызған соғыстың үнін өшіріп, Ұлы Жеңісті жақындату үшін темір жолда тапжылмай еңбек етті. Жұмысынан қол үзбей жүріп теміржолшылар даярлайтын қысқа мерзімді техникумды бітіріп алды. Ұзақ жылғы адал еңбегінің арқасында қатардағы станция кезекшісінен-станция бастығы дәрежесіне дейін көтерілген азамат болды. Көптеген марапаттардың иесі атанды.
Әкесінің тәлім-тәрбиесін көріп, қайсарлығы мен еңбекқорлығын бойына сіңіріп өскен Марат та жастай еңбекке ерте араласты. Сабағын үздік оқып, тоғыз жолдың бойына қоныс тепкен Түлкібас кентіндегі бұрынғы №11, қазіргі белгілі қоғам қайраткері, алты Алаштың мақтанышы атанған Тұрар Рысқұловтың есімін иеленген білім ордасын ойдағыдай бітіріп шықты. Ауылда дүниеге келген балаң жігіт ауыл шаруашылық саласының маманы болу үшін құжаттарын Шымкент совхоз-техникумына тапсырып, студент атанады. Дегенмен, өзі қалаған мамандықты одан әрі терең жетілдіру мақсатында Батыс Қазақстан облысының орталығы – Орал қаласындағы ауыл шаруашылық институтына оқуға түсіп, бұл аталмыш оқу орнын да үздік бітіріп, жоғары білім алып шығады. Студенттік жылдардың қиындау да, қызғылықты шақтарын әйгілі Жайық өзенінің бойындағы тарихи қала – Оралда өткізген Түлкібастың тумасы одан әрі институттың жолдамасымен алғашқы еңбек жолын Қарағанды облысына қарасты «Шұбартау», «Балқаш» кеңшарларында инженер-механик қызметінен бастайды. Осылайша институт қабырғасында жүріп алған теориялық білімін практика жүзінде шебер атқара білген жас маман 1988 жылы Жезқазған облысы, Приозерный ауданында бас инженер-механик жұмысын ұршықтай иіріп, көпшіліктің ортасында абыройы арта түседі.
Жолдама мерзімі бітіп, туған жерімен сағына қауышқан кейіпкеріміз 1990 жылы ауданымыздағы Жабағылы құс фермасындағы автокөлік паркінің басшысы қызметіне орналасады. 1993 жылы Тараз қаласындағы «Айдос» коммерциялық кәсіпорын директорының тізгінін ұстайды. 1995-2005 жылдары Түлкібас аудандық ауыл шаруашылығы басқармасының бас инженер — механигі, басқарма бастығының орынбасары, бөлім бастығы, Түлкібас аудандық әкімдігі жанындағы тұрғын үй- коммуналдық шаруашылығы бөлімінің бастығы қызметтерін атқарады. Содан қай бір сала болмасын өзін суда жүзген балықтай сезінетін іскер азамат 2009 жылдан бері Түлкібас ауданы әкімінің орынбасары болып, қызмет атқарып келеді.
Ұзақ жылдан бері аудандағы ауыл шаруашылық саласындағы адал да, жемісті еңбегі жоғары бағаланып, «Ерен еңбегі үшін», «ҚР Ауылшаруашылық саласының үздігі», «Қазақстан Конституциясына – 10 жыл», «ҚР Тәуелсіздігіне – 20 жыл», «Облысқа сіңірген еңбегі үшін», «ҚР ІІМ Төтенше жағдайлар комитетіне – 20 жыл» мерекелік медалдарымен, «ҚР Ауылшаруашылығы қызметкерлері салалық кәсіподағының І,ІІ дәрежелі, «Еңбек Даңқы» төсбелгілерімен және сонымен қатар облыс, аудан әкімдерінің Құрмет грамоталарымен, Алғыс хаттарымен, Мақтау қағаздарымен марапатталады.
Марат Сүгірәліұлы Жанесеннің ауданның қоғамдық саяси өміріне белсене араласып, өзінің іскерлік, ұйымдастырушылық қабілетімен ел сенімінен шығып келе жатқаны баршаға аян. Асқаралы 63 жастың асуына көтерілгелі отырған қуанышты күн иесін біз де осы бір мерейлі сәтімен шын жүректен құттықтай отырып, деніне саулық, отбасына амандық және өзінен тараған перзенттерінің, немерелерінің қызығын көре беруіне тілектеспіз. Арайланып атқан арайлы ақ таңы тек қуаныш пен шаттыққа толы бола берсін дейміз.
Орынтай КӨМЕКОВ.
