Түлкібаста әйгілі сатирашы, өнер майталманы Алпыспай Боранбайұлының 75 жылдық мерейтойына арналған ерекше бір шара өткізілді. «Алпыспайдың – алпыс әзілінің» атты облыстық әзілкештер байқауы ауданымыздың төрінде өтті. Бұл күн – тек Түлкібастың емес, күллі қазақ сатирасын сыйлайтын үлкен тұлғаның мерейтойы, өнерге деген құрмет пен ілтипаттың белгісі еді.
Тарихы терең Түлкібас жерінен шыққан, қазақтың сатира саласында өзіндік қолтаңбасын қалдырған Алпыспай Боранбайұлының шығармашылығы көпшілікке таныс. Оның әрбір әзілінде терең ой, өткір пікір жатыр. Биыл 75 жасқа толып отырған жерлесіміздің мерейтойы құрметіне аудан әкімдігі осы салтанатты іс-шараны ұйымдастырып, оған зиялы қауым өкілдерін, аудан тұрғындары мен өнерсүйер қауым өкілдерін жинады.
Шараның ашылу сөзін сөйлеген аудан әкімі Асқар Естібаев Түлкібастың қасиетті топырағында туған, өз өнерімен ауданымыздың ғана емес, Алаш жұртының да атын шығарып жүрген жерлесімізді құттықтап, шапан жауып, мерейтойымен құттықтады. Ол Алпыспай Боранбайұлының шығармашылығын ерекше атап өтіп, дәстүрімізді дәріптейтін мұндай шаралардың маңызды екенін айтты. Сонымен қатар, байқауға қатысушыларға сәттілік тіледі.
Мәдени шараның жалғасы байқауға ұласып, облыстың әр ауданынан келген өнерпаздар Алпыспай Боранбайұлының туындыларын сахналап, көрермендерді күлкі мен ойға батырды. Қазылар алқасының шешімімен бас жүлде Сайрам ауданына бұйырды. Ал Түлкібас ауданы бірінші орынға, Келес ауданы екінші орынға, Шардара мен Төлеби аудандары үшінші орындарға ие болды.
Бұл байқау Түлкібас топырағынан шыққан ұлы тұлғаның шығармашылығын жаңа қырынан танытты, сатираның күшін, оның қоғамдағы маңызды рөлін тағы да дәлелдеді. Әзіл мен өнердің бірігіп, сатираның терең мәнін көрсетуге арналған бұл кеш барша қатысушыларға, көрермендерге ұмытылмас әсер қалдырды.
