2024 жылғы 2 қыркүйектегі Қазақстан Республикасының Президенті Қасым-Жомарт Тоқаевтың жолдауында көтерілген «Заң мен тәртіп» қағидасын жүзеге асыру мақсатында аудандық Мәдениет үйінде «Болашаққа мүмкіндік – жаңа өмір» атты форум өтті. Бұл шара пробациялық есепте тұрған азаматтарға психологиялық қолдау көрсету, оларды қоғамға бейімдеу, отбасын құруына көмектесу және жұмысқа орналасуға жәрдемдесу мақсатында ұйымдастырылды.
Форумға жергілікті билік өкілдері, құқық қорғаушы органдардың қызметкерлері, зиялы қауым, ақпарат құралдары өкілдері және пробациялық есепте тұрған азаматтар қатысты. ҚМДБ Шымкент қалалық бас имамының орынбасары, дінтанушы, магистр Мұхамеджан Жамантайұлы, аудан әкімінің орынбасары Ербол Керімбекұлы, сондай-ақ Еркін күрестен Қазақстан Республикасының 3 дүркін чемпионы, Панкратион мен Джиу-Джитсудан әлемнің 4 дүркін жеңімпазы Акбар Елұбайлы форумда сөз сөйлеп, темір тордың ар жағында болған азаматтарға қоғам тарапынан көмек көрсетудің маңыздылығын атап өтті.
Құқық бұзушылықтың алдын алу барша қоғамның ортақ міндеті екені баса айтылды. Азаматтардың қауіпсіздігін қамтамасыз ету, оларды дұрыс жолға бағыттау – қоғамның басты жауапкершілігі. Форум барысында осы мәселелер бойынша жаңа идеялар мен бастамалар талқыланып, нақты шаралар ұсыну жолдары қарастырылды.
